ភ្នំពេញ៖ ក្រុមហ៊ុន Whitworths ដែលមានមូលដ្ឋាននៅចក្រភពអង់គ្លេស មានបំណងទទួលទិញផលិតផលកសិ-កែច្នៃពីកម្ពុជា ដោយផ្តោតសំខាន់លើផលិតផលគ្រាប់ស្វាយចន្ទី និងផ្លែឈើស្ងួត ដើម្បីចែកចាយនៅលើទីផ្សារចក្រភពអង់គ្លេស។

ក្នុងជំនួបពិភាក្សាការងារ កាលពីថ្ងៃទី២៩ ខែមេសា ឆ្នាំ២០២៥ ជាមួយឯកឧត្តម សំហេង បូរ៉ា រដ្ឋលេខាធិការក្រសួងពាណិជ្ជកម្ម និងជាប្រធានក្រុមការងារជំរុញការនាំចេញ គណៈប្រតិភូក្រុមហ៊ុន Whitworths បញ្ជាក់ថា នឹងធ្វើទស្សនៈកិច្ចសិក្សារនៅតាមក្រុមហ៊ុនកែច្នៃគ្រាប់ស្វាយចន្ទីក្នុងស្រុកមួយចំនួន ដើម្បីសិក្សាពីគុណភាព ស្តង់ដា និងត្រៀមខ្លួនសម្រាប់ការនាំចេញផលិតផលទាំងនោះ។

ជំនួបពិភាក្សារវាង ឯកឧត្តម សំហេង បូរ៉ា និងតំណាងក្រុមហ៊ុន Whitworths ដែលមានឯកទេសក្នុងការនាំចូល និងចែកចាយគ្រាប់ធញ្ញជាតិ និងផ្លែឈើសម្ងួតនេះ ធ្វើឡើងក្នុងគោលបំណងពង្រីកទំនាក់ទំនងពាណិជ្ជកម្ម និងបន្តកិច្ចសហប្រតិបត្តិការជំរុញការនាំចេញ។ នេះបើតាមការចុះផ្សាយរបស់ ក្រសួងពាណិជ្ជកម្ម កាលពីថ្ងៃទី២៩ ខែមេសា ឆ្នាំ២០២៥៕