ភ្នំពេញ៖ លោកជំទាវ សុមេធ សុមនា អនុរដ្ឋលេខាធិការក្រសួងពាណិជ្ជកម្ម លើកទឹកចិត្តឱ្យក្រុមហ៊ុន សហគ្រាស និងអាជីវកម្មនៅកម្ពុជា ជំរុញការអភិវឌ្ឍផលិតផលរបស់ខ្លួន ពង្រឹងនវានុវត្តន៍ និងពង្រីកសមត្ថភាពនាំចេញ ដោយផ្តោតលើការស្វែងយល់ទីផ្សារគោលដៅ។ នេះបើតាមការចុះផ្សាយរបស់ក្រសួងពាណិជ្ជកម្ម នាថ្ងៃទី២៧ ខែមិថុនា ឆ្នាំ២០២៥។

ការលើកទឹកចិត្តនេះ ធ្វើឡើងនៅក្នុងក្នុងកម្មវិធីផ្សព្វផ្សាយ «ភាពជាដៃគូធុរកិច្ចរវាងសហភាពអឺរ៉ុប-កម្ពុជា៖ ការនាំចេញ និងនវានុវត្តន៍កសិកម្ម» (Provincial Outreach of the EU-Cambodia Business Partnership: Agri-Innovation Lab and Export Lab)។ ជាមួយគ្នានេះ លោកជំទាវ សុមេធ សុមនា ក៏បានលើកឡើងអំពីការយល់ដឹងពីកិច្ចព្រមព្រៀងពាណិជ្ជកម្មសេរី និងប្រព័ន្ធអនុគ្រោះពន្ធនានា ដើម្បីបង្កើនឱកាសចូលទៅក្នុងទីផ្សារតំបន់ និងទីផ្សារអន្តរជាតិផងដែរ។

កម្មវិធីផ្សព្វផ្សាយនេះ ផ្តោតសំខាន់លើការផ្ដល់ព័ត៌មាន និងសេចក្តីណែនាំអំពីដំណើរការដាក់ពាក្យចូលរួម ការផ្តល់ចំណេះដឹងជាក់ស្តែងដល់ក្រុមហ៊ុនក្នុងការត្រៀមខ្លួនសម្រាប់ការនាំចេញ អនុលោមភាពនៃស្តង់ដារអន្តរជាតិ និងបែបបទក្នុងការចូលទៅកាន់ទីផ្សារអន្តរជាតិ ក៏ដូចជាផ្ដល់ឱកាសសម្រាប់ការផ្សាភ្ជាប់អាជីវកម្ម និងកសាងដៃគូរវាងសហគ្រាស និងភាគីពាក់ព័ន្ធផ្សេងទៀត ជាពិសេសសហគ្រាសដែលដឹកនាំដោយស្ត្រី៕