ភ្នំពេញ៖ ឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ លើកឡើងថា ការប្រើប្រាស់ប្រភេទពូជស្វាយចន្ទីប្រពៃណី មិនប្រើប្រាស់ជីគីមី ក៏មានលក្ខណៈពិសេសដាច់ដោយឡែកផងដែរ តាមរយៈការកែច្នៃលក់ចេញឱ្យភ្ញៀវទេសចរណ៍ជាតិ និងអន្តរជាតិនៅនឹងទីតាំង ដែលអាចទទួលបានប្រាក់ចំណូល និងតម្លៃបន្ថែមកម្រិតខ្ពស់។

ក្នុងឱកាសជួបសំណេះសំណាលជាមួយសហគមន៍ទំនើបស្វាយចន្ទីភ្នំគូលែន នៅឃុំខ្នងភ្នំ ស្រុកស្វាយលើ ខេត្តសៀមរាប ឯកឧត្តមរដ្ឋមន្រ្តីកសិកម្ម ឌិត ទីណា ក៏បានផ្តល់អនុសាសន៍ណែនាំដល់សហគមន៍ ពិនិត្យលទ្ធភាពក្នុងការចិញ្ចឹមមាន់ស្រែ និងជ្រូកគូលែន ដែលមានតម្រូវការទីផ្សារល្អ សម្រាប់ជាប្រភពចំណូលមួយបន្ថែមទៀត។ នេះបើតាមការចុះផ្សាយរបស់ ក្រសួងកសិកម្ម កាលពីថ្ងៃទី២០ ខែកក្កដា ឆ្នាំ២០២៥៕