ភ្នំពេញ៖ តារាចម្រៀងស្រី ទេព បូព្រឹក្ស ដែលជាតារាចម្រៀង ទទួលបានការចាប់អារម្មណ៍ខ្លាំងពីទស្សនិកជន តាមរយៈភាពច្នៃប្រឌិតលើ ស្ទាយ៍តែងខ្លួន និងតែងតែចូលរួមចំណែកផ្សព្វផ្សាយសិល្បៈវប្បធម៌ខ្មែរ។ នៅពេលនេះតារាចម្រៀងស្រី ទេព បូព្រឹក្ស ទទួលបានប័ណ្ណសរសើរ ពីក្រសួងវប្បធម៌ និងវិចិត្រសិល្បៈ តាមរយៈការចូលរួមលើកស្ទួយ និងផ្សព្វផ្សាយសិល្បៈវប្បធម៌ខ្មែរ នៅលើឆាកអន្តរជាតិ ក្នុងកម្មវិធីប្រគំតន្ត្រីនៃមហោស្រព «Round Festival » នៅទីក្រុងកូឡាឡាំពួរ ប្រទេសម៉ាឡេស៊ី។

កាលពីថ្ងៃទី០៤ ខែកញ្ញា ឆ្នាំ២០២៥ លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈបានទទួលជួបលោកស្រី ទេព បូព្រឹក្ស និងក្រុមការងារ ដើម្បីសម្តែងការគួរសម និងធ្វើបទបង្ហាញនូវវីដេអូឯកសារស្តីពីការចូលរួមរបស់លោកស្រី ដែលបានតំណាងឱ្យអ្នកចម្រៀងយុវវ័យកម្ពុជា សម្តែងក្នុងកម្មវិធីប្រគំតន្ត្រីនៃមហោស្រព «Round Festival » នៅទីក្រុងកូឡាឡាំពួរ ប្រទេសម៉ាឡេស៊ី កាលពីថ្ងៃទី២០ ដល់២២ ខែមិថុនាឆ្នាំ២០២៥ នាពេលកន្លងទៅ។

ឆ្លៀតក្នុងឱកាសនោះផងដែរ លោកជំទាវបណ្ឌិតសភាចារ្យ ភឿង សកុណា បានផ្តល់កិត្តិយសដ៏ខ្ពង់ខ្ពស់ ជូនប័ណ្ណសរសើរដល់លោកស្រី ទេព បូព្រឹក្ស និងក្រុមការងារ ដើម្បីជាការលើកទឹកចិត្តសម្រាប់ការចូលរួមលើកស្ទួយ និងផ្សព្វផ្សាយសិល្បៈវប្បធម៌ជាតិនៅលើឆាកអន្តរជាតិ ក្នុងព្រឹត្តិការណ៍ខាងលើ៕