ភ្នំពេញ៖ ស្លាកសញ្ញា និងរចនាលើតួយន្តហោះថ្មីរបស់ក្រុមហ៊ុនអាកាសចរណ៍ជាតិកម្ពុជា(Air Cambodia) គឺបានយកអត្តសញ្ញាណសត្វត្រយ៉ងជាស្នូល ដែលជាសត្វស្លាបតំណាងជាតិកម្ពុជា មានលក្ខណៈការពាររឹងមាំ និងទទួលខុសត្រូវ។ ទន្ទឹមនឹងនេះ នៅពេលធ្វើដំណើរហោះហើររបស់សត្វត្រយ៉ង ស្លាបរបស់វា ត្រូវបានរចនាចេញជាម៉ាស៊ីនអាកាសយាន ដោយមានមុខរណារបឺតខ្យល់ចំនួន១៨ ដែលតំណាងឱ្យបច្ចេកវិទ្យា រក្សាលំនឹង និងការរីកចម្រើន។

ក្នុងពិធីសម្ពោធស្លាកសញ្ញា និងរចនាលើតួយន្តហោះថ្មីរបស់ក្រុមហ៊ុន Air Cambodia ឯកឧត្តមបណ្ឌិត ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល បានលើកឡើងថា ស្លាកសញ្ញាថ្មី របស់ក្រុមហ៊ុនអាកាសចរណ៍ជាតិ ដែលបានទទួលការសម្រេចពីរាជរដ្ឋាភិបាលកម្ពុជា គឺបានបញ្ជាក់នូវតួនាទីកាន់តែសំខាន់ថែមទៀតលើការបង្ហាញអត្តសញ្ញាណជាតិខ្មែរ ទៅកាន់ពិភពលោកទាំងមូល ព្រមទាំងបានឆ្លុះបញ្ចាំងនូវភាពរីកចម្រើន នៃវិស័យអាកាសចរណ៍ស៊ីវិល ទេសចរណ៍ ពាណិជ្ជកម្ម និងការដោះដូរវប្បធម៌ និងប្រជាជននៅកម្ពុជា តាមរយៈការដឹកជញ្ជូនតាមផ្លូវអាកាស។

ចំណែកអត្តសញ្ញាណពណ៌ ត្រូវបានជ្រើសរើសបីពណ៌ជាមូលដ្ឋាន គឺពណ៌ខៀវ ក្រហម និងស ដែលតំណាងឱ្យទង់ជាតិ នៃកម្ពុជា ដែលការបង្ហាញរចនាថ្មីនេះ ធ្វើឡើងនៅលើតួយន្តហោះ ATR72-600 គ្រឿងទី៣ របស់ក្រុមហ៊ុន ដែលជាសញ្ញានៃការចាប់ផ្តើមថ្មី ដ៏មានអត្ថន័យ បង្ហាញពីមហិច្ឆតាថ្មី ដែលផ្សារភ្ជាប់អត្តសញ្ញាណជាតិ ជាមួយនឹងការហោះហើរតភ្ជាប់ កាន់តែទូលំទូលាយ នាពេលអនាគត។ ស្លាកសញ្ញាថ្មី ដែលជាសសរស្ដម្ភសំខាន់នៃអត្តសញ្ញាណនេះ បានទទួលការបំផុសគំនិតយ៉ាងជ្រាលជ្រៅពីបក្សីជាតិរបស់កម្ពុជា គឺសត្វត្រយ៉ងយក្ស ដែលមានន័យស្រដៀង នឹងឥន្រ្ទីដែក។ ការបំផុសគំនិត នៃការការពារភាពរឹងមាំ និងការការពារ ត្រូវបានរចនាជាមួយនឹងស្លាបទាំង១៨ ដែលមានរូបរាងស្រដៀងនឹងស្លាបកង្ហារ របស់ម៉ាស៊ីនយន្តហោះ។ ការរចនានៃការបង្វិល៤៥ដឺក្រេ នៅក្នុងរង្វង់បង្ហាញពីថាមពលស្មារតី នៃការចាប់ផ្តើមថ្មីរបស់កម្ពុជានាយុគសម័យថ្មី៕