ភ្នំពេញ៖ ត្រឹមម៉ោង៥ល្ងាច ថ្ងៃទី២២ មីនា កម្មករនិយោជិតរោងចក្រ Y&W ចំនួន ១ ៩៧២នាក់ បានមកបើកប្រាក់ឈ្នួល និងប្រាក់បំណាច់ផ្សេងៗរបស់ខ្លួន។ បើតាមសេចក្តីប្រកាសព័ត៌មាន ក្រសួងការងារ បានអំពាវនាវដល់កម្មករនិយោជិត ដែលមិនទាន់បានមកបើកប្រាក់ឈ្នួល និងប្រាក់បំណាច់ផ្សេងៗ សូមត្រៀមឯកសារពាក់ព័ន្ធ និងរួសរាន់មកបើកឱ្យបានគ្រប់ៗគ្នា។

សេចក្ដីប្រកាសព័ត៌មានស្តីពីការបើកផ្តល់ប្រាក់ឈ្នួល និងប្រាក់បំណាច់ផ្សេងៗជូនបងប្អូនកម្មករនិយោជិត នៃក្រុមហ៊ុន វ៉ាយ & ដាប់ប៊ែលយូ ហ្គាមេន (Y & W GARMENT CO., LTD.) របស់ក្រសួងការងារ បានឱ្យដឹងថា ក្រសួង បានចាប់ផ្ដើមបើកប្រាក់ឈ្នួល និងប្រាក់បំណាច់ផ្សេងៗជូនកម្មករនិយោជិត នៅសាលាខណ្ឌដង្កោ រាជធានីភ្នំពេញ កាលពីថ្ងៃទី២២ មីនា។ ក្រសួងការងារ នឹងបន្តបើកប្រាក់ឈ្នួលនេះទៀត នៅថ្ងៃទី២៣-២៤ មីនា និងថ្ងៃបន្តបន្ទាប់ទៀត ចាប់ពីម៉ោង ៧:៣០នាទីព្រឹក ដល់ម៉ោង ៥:៣០នាទីល្ងាច ដើម្បីបង្កភាពងាយស្រួល ដល់បងប្អូនកម្មករនិយោជិតដែលមានការងារថ្មី។

នាឱកាសបើកប្រាក់ឈ្នួល និងប្រាក់បំណាច់ផ្សេងៗ ក្រសួងក៏ផ្តល់ជូននូវទឹកសុទ្ធ ភេសជ្ជៈ និងអាហារសម្រន់ដល់កម្មករនិយោជិតផងដែរ។ ចំពោះកម្មករនិយោជិត ដែលមិនទាន់មានការងារធ្វើ អាចទំនាក់ទំទងមកកាន់ទីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្តុះបណ្តាលវិជ្ជាជីវៈ ដែលនឹងបន្តប្រចាំការនៅខាងមុខសាលាខណ្ឌដង្កោ និងទីស្តីការក្រសួងការងារ និងបណ្តុះបណ្តាលវិជ្ជាជីវៈបាន៕