ភ្នំពេញ៖ បច្ចុប្បន្ន កម្ពុជា មានកូនខ្មែរ មានមន្រ្តីខ្មែរ ដែលមានសមត្ថភាពសរសេរផែនការរាជរដ្ឋាភិបាលបានដោយខ្លួនឯង ព្រមទាំងមានសមត្ថភាពលើការបង្កើតបច្ចេកវិទ្យាឌីជីថលកាន់តែច្រើនបន្ថែមទៀត។ នេះជាការលើកឡើងរបស់សម្តេចធិបតី ហ៊ុន ម៉ាណែត ក្នុងពិធីសម្ពោធកសិដ្ឋានចិញ្ចឹមគោយកទឹកដោះគិរីសួគ៌ កាលពីថ្ងៃទី១១ ខែមេសា ឆ្នាំ២០២៤។

សម្តេចធិបតីនាយករដ្ឋមន្រ្តី បានគូសបញ្ជាក់ថា៖«កាលពីដើមឡើយ កម្ពុជា ត្រូវការជំនួយធនធាន ក៏ដូចជាអ្នកជំនាញពីក្រៅប្រទេសច្រើន ដោយមានទីប្រឹក្សាធនាគារពិភពលោក និងមូលនិធិរូបិយវត្ថុអន្តរជាតិជាដើម ដើម្បីមកជួយកសាង និងសរសេរផែនការផ្សេងៗឱ្យកម្ពុជា។ ប៉ុន្តែមកដល់សព្វថ្ងៃនេះ រាល់ផែនការទាំងអស់ដែលរដ្ឋាភិបាលដាក់ចេញ គឺសរសេរដោយសមត្ថភាពកូនខ្មែរ មន្រ្តីរបស់ខ្មែរ ដែលហេតុនេះ នាំឱ្យកម្ពុជាក្លាយជាប្រទេសមានចំណូលមធ្យមកម្រិតទាបក្នុងរយៈពេលដ៏ខ្លី»។

រាល់ការវិនិយោគ ការទាក់ទាញវិនិយោគិន ការបណ្តុះបណ្តាលផ្សេងៗ ត្រូវបានផ្សារភ្ជាប់គ្នាពីការផ្ទេរជំនាញ ហើយកូនខ្មែររបស់យើង អាចមានសមត្ថភាពកសាងអ្វីដែលធំឱ្យកាន់តែធំទៀតផង។ ជាក់ស្តែង កាលពីពេលថ្មីៗនេះ កម្មវិធី Verify.com ដែលបង្កើតឡើងដោយកូនខ្មែរ ទទួលបានមេដាយមាសនៅក្នុងចំណោមប្រទេសសមាជិកអាស៊ាន ដែលនេះបានបញ្ជាក់យ៉ាងច្បាស់ថា កម្ពុជាបានរីកចម្រើនខាងផ្នែកបច្ចេកវិទ្យាឌីជីថល។ សម្តេចធិបតីបានលើកឡើងបន្ថែមទៀតថា មានបច្ចេកវិទ្យាឌីជីថលផ្សេងៗជាច្រើនទៀត ដែលកូនខ្មែរបានបង្កើតឡើង ដោយមិនចាំបាច់ឱ្យកម្ពុជាទិញគេដូចពីមុនទៀតឡើយ៕