ភ្នំពេញ៖ «ប្រកាសនីយបត្រតក្កកម្ម» មានតួនាទីសំខាន់ក្នុងការការពារកម្មសិទ្ធិបញ្ញា ទាក់ទាញអ្នកវិនិយោគ និងបង្កើនទំនុកចិត្តលើសេដ្ឋកិច្ចកម្ពុជា។ នេះជាការលើកឡើងរបស់ឯកឧត្តមរដ្ឋមន្ត្រីឧស្សាហកម្ម ដោយឯកឧត្តមបានរំលេចពីសារសំខាន់របស់វាដូច្នេះថា ផ្តល់ភាពអង់អាចដល់សហគ្រាសធុនមីក្រូ តូច និងមធ្យម អ្នកស្រាវជ្រាវ និងអ្នកច្នៃប្រឌិត ដើម្បីពន្លឿននវានុវត្តន៍ និងលើកកម្ពស់ការប្រកួតប្រជែង ទន្ទឹមនឹងនោះទប់ស្កាត់ការរំលោភបំពាន និងការក្លែងបន្លំ។

ឯកឧត្តម ហែម វណ្ណឌី រដ្ឋមន្ត្រីក្រសួង ឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានឱ្យដឹងពីគោលដៅនៃការដាក់ឱ្យដំណើរការ«មូលដ្ឋានទិន្នន័យប្រកាសនីយបត្រតក្កកម្មកម្ពុជា (Cambodia Patent Database)» នៅថ្ងៃទី២៩ ខែមេសា ឆ្នាំ២០២៤នេះ ថា ដើម្បីពង្រឹងការការពារកម្មសិទ្ធិបញ្ញា និងជំរុញនវានុវត្តន៍។ ទន្ទឹមនឹងការប្រកាសដាក់ឱ្យដំណើរការនេះ ក្រសួងក៏បានបើកជាសិក្ខាសាលា ដើម្បីពង្រឹងសមត្ថភាពលើការប្រើប្រាស់សេវាអនឡាញរបស់មូលដ្ឋានទិន្នន័យនេះផងដែរ។

ឯកឧត្តមរដ្ឋមន្ត្រី បានលើកឡើងយ៉ាងដូច្នេះថា ប្រកាសនីយបត្រតក្កកម្ម បានផ្តល់នូវការការពារផ្លូវច្បាប់ប្រឆាំងនឹងការប្រើប្រាស់ដោយគ្មានការអនុញ្ញាត ឬការរំលោភលើអ្វីដែលការបង្កើតថ្មី។ ដូច្នេះ ដើម្បីជំរុញការស្រាវជ្រាវ និងការអភិវឌ្ឍផលិតផល បច្ចេកវិទ្យាថ្មីៗ និងនវានុវត្តន៍ឱ្យរីកចម្រើនជឿនលឿន វាជារឿងសំខាន់ណាស់ ដែលលទ្ធផលការស្រាវជ្រាវ និងអភិវឌ្ឍន៍ទាំងនោះទទួលបានការការពារ។

កម្មសិទ្ធិបញ្ញាមានទម្រង់ផ្សេងៗ រួមទាំងប្រកាសនីយបត្រតក្កកម្ម ពាណិជ្ជសញ្ញា សិទ្ធិអ្នកនិពន្ធ និងអាថ៌កំបាំងពាណិជ្ជកម្មជាដើម។ កម្មសិទ្ធិបញ្ញាផ្តល់សិទ្ធិផ្តាច់មុខដល់អ្នកបង្កើត និងអ្នកច្នៃប្រឌិត ចំពោះការបង្កើតថ្មីរបស់ពួកគេ ដែលអនុញ្ញាតឱ្យពួកគេគ្រប់គ្រង និងទទួលអត្ថប្រយោជន៍ពីកម្មសិទ្ធិបញ្ញារបស់ខ្លួន៕