ភ្នំពេញ៖ សម្តេចធិបតី ហ៊ុន ម៉ាណែត បានសម្រេចឱ្យសិទ្ធិឯកឧត្តម គី តិច ប្រធានក្រុមមេធាវីរបស់រាជរដ្ឋាភិបាល ដឹកនាំរៀបចំចាត់តាំងមេធាវីរាជរដ្ឋាភិបាលឱ្យការពារសិទ្ធិ និងផលប្រយោជន៍ប្រជាពលរដ្ឋរងគ្រោះ ពាក់ព័ន្ធនឹងក្រុមហ៊ុន ប៊ីលាន ស៊ីធី វើលដ៍ ឯ.ក (BRILLIANT CITY WORLD CO., LTD.) របស់អតីតឧកញ៉ា ឡេង ចាន់ណា។

ការដែលប្រធានសិទ្ធិពាក់ព័ន្ធនឹងការដោះស្រាយក្នុងគម្រោងឆបោកមួយនេះ ធ្វើឡើងក្រោយប្រជាពលរដ្ឋរងគ្រោះ ស្នើសុំកិច្ចអន្តរាគមន៍ពីសម្តេចធិបតី ហ៊ុន ម៉ាណែត។ បើតាមការចុះផ្សាយរបស់សម្តេចធិបតីនាយករដ្ឋមន្រ្តី នាថ្ងៃទី១៥ ខែឧសភា ឆ្នាំ២០២៤ មេធាវីរបស់រាជរដ្ឋាភិបាល នឹងការពារសិទ្ធិ និងប្រយោជន៍ពលរដ្ឋរងគ្រោះ ក្នុងសំណុំរឿងទាំងឡាយដែលកំពុងចាត់ការដោយស្ថាប័នអយ្យការ និងស្ថាប័នតុលាការ នៅគ្រប់ស្ថាប័នមានសមត្ថកិច្ចពាក់ព័ន្ធ និងសាលាជម្រះក្តីគ្រប់ជាន់ថ្នាក់ រហូតដល់សំណុំរឿងត្រូវបានបញ្ចប់ជាស្ថាពរ។

សម្តេចធិបតី ហ៊ុន ម៉ាណែត បានស្នើមេធាវីរាជរដ្ឋាភិបាល និងស្ថាប័នមានសមត្ថកិច្ចពាក់ព័ន្ធ ខិតខំយកចិត្តទុកដាក់ការពារប្រជាពលរដ្ឋ ដែលរងគ្រោះនៅក្នុងសំណុំរឿងនេះ ដើម្បីធានាឱ្យបាននូវការអនុវត្តច្បាប់ឱ្យបានម៉ឺងម៉ាត់ទៅតាមនីតិវិធីជាធរមាន។ រាជរដ្ឋាភិបាល នឹងបន្តតាមដានដោយយកចិត្តទុកដាក់លើសំណុំរឿងនេះ។

គម្រោងវិនិយោគរបស់អតីតឧកញ៉ា ឡេង ចាន់ណា គឺជាគម្រោងមានលក្ខណៈប្រព័ន្ធឆបោកតាមរូបមន្ត Ponzi Scheme ខុសពីគម្រោងវិនិយោគអចលនទ្រព្យពិតប្រាកដ ដែលប្រឈមឧបសគ្គនឹងបញ្ហានៃការធ្លាក់ចុះទីផ្សារនោះទេ។ ផ្អែកលើលទ្ធផលនេះ សមត្ថកិច្ចបានឃាត់ខ្លួនឈ្មោះ ឡេង ចាន់ណា ដើម្បីបញ្ជូនទៅតុលាការតាមនីតិវិធីជាធរមាន កាលពីថ្ងៃទី១២ ខែមីនា ឆ្នាំ២០២៤៕