ភ្នំពេញ៖ បណ្ដាធុរជន សហគ្រិន វិនិយោគិន និងផលិតករ ដែលមានបំណងស្វែងរកដៃគូពាណិជ្ជកម្មថ្មីៗ និងមានបំណងតភ្ជាប់ទំនាក់ទំនងពាណិជ្ជកម្ម ជាមួយពាណិជ្ជករចិន និងអន្តរជាតិ អាចដាក់ពាក្យចូលរួមព្រឹត្តិការណ៏«ពិព័រណ៍ពាណិជ្ជកម្មទំនិញនាំចូលអន្តរជាតិចិនលើកទី៧» The 7th China International Import Expo(CIIE) ដែលប្រព្រឹត្តឡើងនៅថ្ងៃទី៥-១០ ខែវិច្ឆិកា ឆ្នាំ២០២៤ នៅទីក្រុងសៀងហៃ ប្រទេសចិន។

បើតាមការចុះផ្សាយរបស់ក្រសួងពាណិជ្ជកម្ម នាថ្ងៃទី២០ ឧសភា បានបញ្ជាក់ថា ពិព័រណ៍ពាណិជ្ជកម្មទំនិញនាំចូលអន្តរជាតិចិន គឺជាព្រឹត្តិការណ៍ពាណិជ្ជកម្មដ៏ធំមួយរបស់ប្រទេសចិន និងជាវេទិកាធុរកិច្ចដ៏សំខាន់សម្រាប់កិច្ចសហប្រតិបត្តិជាអន្តរជាតិលើវិស័យសេដ្ឋកិច្ច ពាណិជ្ជកម្ម វិនិយោគ និងទំនាក់ទំនងការទូតរវាងបណ្ដាប្រទេសចូលរួមទាំងអស់ក្នុងពិភពលោកជាមួយប្រទេសចិន។

ជាមួយគ្នានេះ ក្រសួងពាណិជ្ជកម្ម ផ្ដល់អាទិភាពខ្ពស់ដល់ធុរកិច្ចក្នុងវិស័យកែច្នៃកសិផលមួយចំនួន ដូចជា អង្ករ ស្វាយចន្ទី ម្រេច គ្រឿងទេស ម្ហូបអាហារកែច្នៃ គម្រោងវិនិយោគក្នុងតំបន់សេដ្ឋកិច្ចពិសេស វិស័យដឹកជញ្ជូននិងភស្ដុភារកម្ម និងវិស័យពាក់ព័ន្ធផ្សេងៗទៀតដែលទើបបង្កើតថ្មី។ ចំពោះបណ្ដាធុរជន សហគ្រិន វិនិយោគិន និងផលិតករ ដែលមានបំណងចូលរួមអាចដាក់ពាក្យពីថ្ងៃជូនដំណឹងនេះរហូតដល់ ថ្ងៃទី២៥ ខែកក្កដា ឆ្នាំ២០២៤ ឬអាចទំនាក់ទំនងមកកាន់នាយកដ្ឋានកិច្ចការពិព័រណ៍ អគ្គនាយកដ្ឋានជំរុញ ពាណិជ្ជកម្ម នៃក្រសួងពាណិជ្ជកម្ម តាមរយៈលេខទូរសព្ទ៖ ០១៦ ៤១៦ ៨២៥, ០៨៦ ៣៣៣ ៩៣៣, ០១២ ៧០៣ ៣៩៣៕